A Jorge Juan participou nas Xornadas de Atletismo Divertido 2025

Entre os días 9 e 10 de abril, o alumnado da Jorge Juan de Perlío participou, xunto cos demais centros educativos do Concello de Fene, nunha nova edición das Xornadas de Atletismo Divertido, organizadas pola Concellaría de Deportes.

Nesta ocasión, a actividade desenvolveuse nas pistas polideportivas do IES de Barallobre, que se converteron nun espazo de encontro, movemento e aprendizaxe. O circuíto contou cunha variedade de probas inspiradas nas disciplinas do atletismo: carreiras de velocidade e de obstáculos, lanzamento de peso e xavelina, saltos de altura e laterais… todo adaptado para garantir a diversión e a participación de todos e todas.

O noso alumnado participou con entusiasmo e ilusión, gozando dunha xornada onde o máis importante foi compartir experiencias e fortalecer lazos con nenos e nenas doutros colexios, nun ambiente lúdico e non competitivo.

Desde a Jorge Juan queremos agradecer ao Concello de Fene a organización desta actividade, que nos permite seguir promovendo o deporte como ferramenta de educación en valores: compañeirismo, esforzo, respecto e inclusión.

Agardamos con moitas ganas a próxima edición!

Poderedes ver moitas máis fotografías na conta de Instagram do colexio