25N – “Chalk Back”: Non ao acoso na rúa

O pasado 25 de novembro, o noso centro, a Jorge Juan de Perlío, uniuse ás actividades promovidas pola Fanpa Ferrolterra e a área de Igualdade da Deputación da Coruña no marco do Día Internacional contra a Violencia de Xénero. Esta iniciativa contou coa participación de 47 centros escolares de toda a comarca, reunindo máis de 9.000 estudantes comprometidos coa loita por unha sociedade máis igualitaria e libre de violencia.

Este ano, a actividade centrouse na violencia exercida contra as mulleres na rúa, especialmente a través de comentarios non desexados e “piropos” que resultan ofensivos. Para visibilizar esta problemática, o alumnado participou na iniciativa “Chalk Back”, unha acción que invita a reflexionar e a expresarse. No noso centro, preparouse un muro a modo de encerado onde o estudantado escribiu frases e comentarios que consideran ferintes ou molestos. Unha vez completado o encerado, estas mensaxes foron fotografadas como parte dunha exposición colectiva que se presentará nun encontro organizado na sede de Afundación.


Desde a Jorge Juan de Perlío, agradecemos a oportunidade de participar nesta iniciativa, que non só reforza os valores de igualdade entre o noso alumnado senón que tamén contribúe a xerar conciencia social sobre un problema que afecta a toda a cidadanía. A educación é unha ferramenta clave para cambiar a realidade e fomentar unha convivencia respectuosa e xusta.